Hamairu poeta palestinar: gailendu dadila hitza

Genozidioa aditzeraz edo, zeharkako eta urruneko testigantzaz besterik, ezagutzen ez dugunok ere ezin diogu aisa ihes egin haren itzalari. Izan ere, bada ardura unibertsal bat bere larruan ez bada, bere herrian halakorik bizi duenari begirune humanoz bide ematea.

Handia da elkartasunaren ahala. Bakoitzak bere gogoaren eta egokieraren arabera topa dezake elkartasuna erakusteko era. APOA taldean poesia irakurtzen dugu taldean, hori da gure jardun iraultzailearen alderdi bat. Bestea da, pertsona garen aldetik, duintasunez bizitzen saiatzea ahal dugun heinean, ahal dugun denean. Herriko jendea gara.

Hemen bildu dugun hitza genozidioaren muinera begira mintzo da, APOAko hainbat kidek hitz horri ahotsa jarri diogu. Abagune historiko tragikoenen lekukotza ematea ere badagokio artearen edertasunari, eta esku-eskura jarri zaigunez, horren lagin garaikide bat dakargu grabazio sorta honekin.

SENEZ itzulpen aldizkariaren 56. zenbakian, Isabel Etxeberria Ramirezek bildu eta editatu ondoren, hamalau itzultzaileren ahaleginari esker euskarara ekarritako poema bilduma eman dute argitara joan den udazkenean. Goiburua, hau: “Hamahiru poeta palestinar: gailendu dadila hitza”. Beraz hor du zorraren lehen iturria egungo gure lehengai poetikoak.

Palestinar literatura, artea, musika, bere lurraren, eta ederrez mindutako giza nortasunaren, deia jaso ahala deika ari zaio lurrari berriz, munduan diren herri guztien antzera. Lurra gorputz kolektiboa bada, gorputza balizko herri asmo baten lur txatal ere izaten ahal da. Eta oraindik bere buruari edo izarrei libre izateko promesa egin diezaiokeen pertsonak, herriak, badu altxor prekario bat.

______

Itzulpenak: Eider Beobide (Alkandora berdea; Bereizketa hesia; Izarrik gabeko gau batean; Gure aitona terrorista zen), Olatz Esteban (Pikutara zure arte-irakaspenak, nire jendea hiltzen ari da), Larraitz Fagundez (Sábir eta Zainab teilatura igo zirenekoa; Iraultza abian), Garazi Goldarazena (Bai, ez gara hilen, baina; Zorroztu ezpata zeure lepoan), Oihane Gurrutxaga (Galdeketa baten laburpena), Miren Irizar(Haren baitan egon baino ez dut nahi) , Leire Lakasta (Sábir eta Zainab teilatura igo zirenekoa; Iraultza abian), Maria Oses (Alkandora berdea; Bereizketa hesia; Izarrik gabeko gau batean; Gure aitona terrorista zen), Maider Ramirez (Bonbila apurtua dir-dirka), Ainhoa Salaberria (Ia lau urteko norbaiten egunerokotik), Iñigo Satrustegi (Diaspora), Nora Unanue (Bizitza irakasten dugu, jauna) Arkaitz Uranga (Itxaropena deritzon fobia bat pairatzen dut), Anitz Zapirain (Bai, ez gara hilen baina; Zorroztu ezpata zeure lepoan)

Koordinazioa eta edizioa: Isabel Etxeberria Ramírez